Mipa naupang kum 8 mi Thomas-a chu naupang sawngnawi ang reng tak anih bakah, a beng hriatna a chak vak lo lehnghal a. A kum rualpuite chu infiamnaah leh Sikul zirna lamah pawh a pha lo ang reng hle a, Thil zirtir a man har thin em avangin, an zirtirtute pawhin an buaipui bakah, an dawhtheihnain a tlin ta thin lova, an hau nasain an vin nasa hle mai thin a ni. Chutia an zirtirtuten deusawh tak taka an hauh fo thin avang chuan, a pawlpuite pawh chuan, an hmusitin an tinawmnah fo thin a, nuihza siam nan te an hmang thin a ni. Nimahsela, miin an hmuhsit leh an cheksawlh nasat poh leh a Nu erawh chuan a hmangaihin a khawngaihna a zual zawk zel emaw tih turin dawhthei takin Tlai Sikul ban hnuah an Chokaah chuan, eirawng bawl pahin a zirtir tang tang thin a, a fapain Sikula a thil tuar thin chi hrang hrang a sawi thin te chu, Khawngaihna leh lainatna mittui nen a lo ngaihthlak sak vek thin a, a fapa chu tawng thlamuanin hmangaih takin a kuah vawng vawng thin a ni.
Tlaikhat phei chu, Thomas-a chuan an Headmaster lehkha a rawn hum haw a. A rilru a chak loh leh thil a man har lutuk avangin, a pawlpuite leh Zirtirtute tan phurrit a siam nasa lutuka hriain, an Headmaster chuan, an Sikula zir thei tawh lo turin a hnawtchhuak a lo ni a. A nu chu a rilru na teh mahse, engmah a sawi lova, an Headmaster demna thu kam khat pawh a chhak chhuak hek lo. A fapa chu a kuah vawng vawng a, ‘A pawi lutuk lem lo ve, thil awmdan a la ziaawm leh mai ang” tiin a fapa chu a hnem a ni. Thomas-a chu, hmangaih leh dawhthei taka zirtir chuan, naupang dang ang thovin a zir ve thei a ni tih chu a ring tlat a, thahnemngai tak leh dawhthei takin amah ngei chuan, in lamah a zirtir chhunzawm ta zel a ni.
A nuin hmangaih leh dawhthei taka a zirtirna chuan, Rah a rawn chhuah tan ta a, Thomas-a chuan, thil thar eng eng emaw siamin a enchhin ta tlut tlut mai a. A tirah chuan, a nuihzatthlakin, thil ropui tak a siam chhuah hmel lem lohva, amaherawhchu, a nu chuan, amahah rinna a nghat tlat a, vawi tam fail mahse, beidawng duh hauh lovin a bei zel a, a hun hnuhnung a lo thlen a, he khawvel a chhuahsan ni a lo thlen meuh chuan, Khawvela ram ropui ber United States of America chuan, amah chawimawi nan leh an ui zia tihlan nan, America ram pumpuiah Minute khat chhung Electric eng zawng zawng an tithim vek a ni.
He Thomas-a hi a rilru chakloh lutuk avanga an headmaster-in Sikul atanga a hnawhchhuah tak ngawt kha a nilovem ni? A pawlpui te pawhin an nuih hluah hluah thin kha a ni lovem ni le? Ni ngei si e. Thomas Alva Edision Light bulb leh Phonograph(Ri(Sound) Record a, ngaihthlak leh theihna lam chi) thiamna ngaihtuah chhuak a, a taka siam chhuaktu ngei chu a nih avangin, chu a thil hmuhchhuah chu Mihringte tana a tangkai em em avangin, a chunga an lawm zia entir nan leh an ngaih ropui zia entir nan, a thihni chuan, America ram pum puiah Minute khat chhung Electric eng zawng zawng an tithim vek a nih chu. Amah hnawtchhuaktu Headmaster te, a pawlpui ho amah hmusita nuihzat thin ho ve kha, America ram pumpuiin Thomas-a an chawimawi lai hian khawiah nge an awm ve a, tu hriat nge an hlawh ve le? Rimawi ngainatute leh Electric eng tangkaizia hretu zawng zawngte tan chuan, mi ngaihsanawm ava han ni chiang tak em.
Pathianin duh taka a siam Mihring mimal tin teah hian, mi nazawng hmuh theih loh, thil tha, mawi leh duhawm hi a in phum vek a ni. Amaherawhchu, hmuh theiha parchhuahtir tur chuan, hmangaih leh dawhthei taka enkawl leh inchhawmdawl erawhchu a ngai thin a ni. Mi tam tak hi, kan enkawl thiam loh leh dik loh avangin, Misual leh mi hnawksakah kan chhuah fo thin a, mi tha leh tangkai tak tak turte pawh, kan enkawl leh treat dan dik loh avangin, engmahloah emaw, mihnawksak leh misualah kan chhuah fo thin a ni. Pathianin duh taka a siam mimal tinte hi, kan duhawmna, tangkaina leh mawina thuruk theuh hi inhmuhchhuah sak tawn theuh zel ang u.